Մյուս տարվանից Լարսի հատվածում կսկսի թունելի կառուցումը. Վահան Մարտիրոսյան
26.09.2017
Այսօր ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը լրագրողների հետ հանդիպմանը անդրադառնալով Լարսին այլընտանքային ճանապարհին, ասաց, որ ընդհանրապես ինքը լավատես է և վստահ է, որ ուշ թե շուտ ոչ միայն Վրաստանով դեպի Ռուսաստան, այլ ամբողջ աշխարհում շատ փակ ճանապարհները կբացվեն, քանի որ ժողովուրդները շփման կարիք ունեն:
Վահան Մարտիրոսյանը հայտնեց, որ ձմռանն ընդառաջ Լարսի ճանապարհին վրացական կողմն ավելացրել է ճանապարհները մաքրող միջոցները: «Նախագծային աշխատանքներ են գնում այդ հատվածում թունելի կառուցման ուղղությամբ և մյուս տարվանից կսկսի թունելի կառուցումը և կտևի երեք տարի»,-ասաց նա:
Նախարարը նշեց, որ այլընտրանքային ճանապարհը ոչ միայն ցամաքային ճանապարհն է, այլ նաև լաստանավային ճանապարհը: «Ինչ վերաբերում է ցամաքային այլընտրանքային ճանապարհներին, ապա դա գտնվում է երկու այլ պետությունների տարածքում: Մենք կարող ենք միայն իրենց հետ աշխատելով գտնել լուծում, մենք չենք կարող առաջարկ ներկայացնել Վրաստան-Ռուսաստան ավտոճանապարհի կառուցման առումով»,-ասաց նա:
Անդրադառնալով վարչապետ Կարեն Կարապետյանի՝ այլընտրանքային ճանապարհ գտնելու հանձնարարականին և հարցին, թե ինչ նկատի ուներ նա, Վահան Մարտիրոսյանն ասաց, որ վարչապետը նկատի ուներ օդային, ծովային և ցամաքային ճանապարհը: «Հանձնարականը կատարվել է և մենք ներկայացրել ենք տարբերակներ և քննարկումները գնում են հարևան պետությունների հետ, որպեսզի Լարսի անցում հարյուր տոկոսանոց բաց լինի և վրացական կողմը թունելի կառուցման ծրագիրն է առաջարկել»,-ասաց նա: