Նորություններ

Ստեփանծմինդա - Լարս ավտոճանապարհի երթեւեկությունը սահմանափակ է, Հայաստանի որոշ մարզերում ձյուն է տեղում

22.11.2017 աղբյուր : www.arka.am

Վրաստանի ենթակառուցվածքների և տարածաշրջանային զարգացման նախարարության ճանապարհային դեպարտամենտից ՀՀ տրանսպորտի, կապի և տեղեկատվական տեխնոլոգիաների նախարարությանը տեղեկացնում են, որ «Ստեփանծմինդա - Լարս» ավտոճանապարհը նոյեմբերի 22-ին՝ ժամը 10:00-ի դրությամբ, ծանրաքաշ մեքենաների համար փակ է:

«Ավտոճանապարհը բաց է միայն թեթև մարդատար ավտոմեքենաների համար»,- նշված էր հաղորդագրությունում:

«Վերին Լարս» անցակետը Հայաստանը Ռուսաստանի հետ կապող միակ ցամաքային երթուղին է:

Նախարարության մամուլի ծառայությունը տեղեկացնում է նաև, որ 9:30-ի դրությամբ Հայաստանի մի շարք քաղաքներում ձյուն է տեղում:

Այսպիսով՝ ձյուն է տեղացել Գյումրիում, Մարալիկում, Արթիկում, Աշոցքում, Աբովյանում, Հրազդանում, Աշտարակում, Ապարանում, Արագածում, Թալինում, Վանաձորում, Սպիտակում, Ստեփանավանում, Թումանյանում, Տաշիրում և Սևանում, ինչպես նաև Դիլիջանում:

«Ճանապարհների անվտանգ երթևեկությունն ապահովելու համար իրականացվում են մաքրման աշխատանքներ: Վթարներից, դժբախտ պատահարներից, խցանումներից և վթարային իրավիճակներից խուսափելու նպատակով նախարարությունը վարորդներին հորդորում է երթևեկել միայն ձմեռային անվադողերով»,- ասվում էր հաղորդագրությունում:

Ավելի վաղ տեղեկացվել էր, որ նոյեմբերի 22-ի առավոտյան Հայաստանը գտնվելու է հզոր ցիկլոնի ազդեցության գոտում, հանրապետության ողջ տարածքում, այդ թվում՝ Երևանում, սպասվում են տեղումներ, որոշ մարզերում՝ ձյան տեսքով: