Նորություններ

«Վերին Լարսի» ֆունկցիոնալության օպտիմալացման ուղղությամբ աշխատանքները կավարտվեն նոյեմբերին. Վլադիմիր Մեդինսկի

29.06.2018 աղբյուր : news.am

«Վերին Լարս» ավտոմոբիլային անցակետի ֆունկցիոնալության օպտիմալացման ուղղությամբ աշխատանքները կավարտվեն 2018 թվականի նոյեմբերին։ Այս մասին հունիսի 29-ին Երեւանում կայացած Հայ–ռուսական 7-րդ միջտարածաշրջանային ֆորումում հայտարարել է ՌԴ մշակույթի նախարար, ռուսական պատվիրակության ղեկավար Վլադիմիր Մեդինսկին։

Նա նշել է, որ Հայաստանի եւ Ռուսաստանի միջեւ փոխգործակցությունը տրանսպորտային ոլորտում կայուն կերպով զարգանում է, եւ ռուսական կողմը, առաջին հերթին, իրականացնում է «Վերին Լարս» ավտոմոբիլային անցակետի ֆունկցիոնալության կատարելագործման ուղղությամբ պայմանավորվածությունները։ «Նոյեմբերին կավարտվեն ֆունկցիոնալության օպտիմալացման ուղղությամբ աշխատանքները՝ մասնավորապես, անցակետի մուտքի երթեւեկության գոտիների թիվը կավելանա մեկից մինչեւ չորս, որն իհարկե էականորեն կբարելավվի տրանսպորտային իրավիճակը»,–նկատել է Մեդինսկին։

Նա հայտնել է, որ երկաթուղային տրանսպորտի ոլորտում շարունակվում է ՀԿԵ-ի երկաթուղային համակարգի կառավարման վերաբերյալ կոնցեսիոն համաձայնագրի իրականացումը՝ հավելելով, որ ՌԴ–ն ՀՀ երկաթուղային համակարգում ներդրել է ավելի քան 250 մլն դոլար։